ភ្នំពេញ៖ សន្និសីទអាស៊ីនិងប៉ាស៊ីហ្វិកលើកទី៥ ឆ្នាំ២០២៣ ស្តីពី “បរិយាបន្នពិការភាពក្នុងកម្មវិធីអភិវឌ្ឍន៍សហគមន៍” នឹងប្រព្រឹត្តិទៅនៅទីក្រុងភ្នំពេញនាពាក់កណ្តាលខែមីនា ឆ្នាំ២០២៣ ដែលកម្ពុជានឹងធ្វើជាម្ចាស់ផ្ទះ។

ការទទួលធ្វើជាម្ចាស់ផ្ទះនៃព្រឹត្តិការណ៍ដ៏ធំនៃសន្និសីទអាស៊ីនិងប៉ាស៊ីហ្វិកលើកទី៥ ឆ្នាំ២០២៣ គឺជាការបានបង្ហាញពីការយកចិត្តទុកដាក់ជាចំបងចំពោះសុខុមាលភាព និងសេចក្តីថ្លៃថ្នូររបស់ជនមានពិការភាពនៅកម្ពុជា តាមរយៈការអនុម័តច្បាប់ស្ដីពីកិច្ចការពារ និងលើក កម្ពស់សិទ្ធិជនពិការ ២០០៩ គោលនយោបាយជាតិគាំពារសង្គម ផែនការយុទ្ធសាស្ត្រជាតិស្តីពីពិការភាព បទដ្ឋានគតិយុត្តិក្រោមច្បាប់ និងគោលការណ៍ណែនាំផ្សេងៗជាច្រើនទៀត។

រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា លោក វង សូត បានហៅការគ្រោងរៀបព្រឹត្តិការណ៍ខាងមុខនេះថាជាព្រឹត្តិការណ៍ប្រវត្តិសាស្ត្រថ្មីនៃវិស័យពិការភាព ដែលកន្លងមករាជរដ្ឋាភិបាល ក៏ដូចជាក្រសួងសង្គមកិច្ចបានខិតខំដោះស្រាយបញ្ហាជាច្រើនដើម្បីប្រយោជន៍របស់ជនមានពិការភាពនៅកម្ពុជារួមទាំងការស្តារលទ្ធភាពពលកម្មកាយសម្បទា ការផ្តល់ផ្ទះសម្បែង ប្រាក់ឧបត្ថម្ភដល់ជនពិការក្រីក្រតាមសហគមន៍ជាដើម។

កម្ពុជាបានផ្តល់សច្ចាប័នលើអនុសញ្ញាស្តីពីសិទ្ធិជនពិការ នៅថ្ងៃទី២០ ខែធ្នូ ឆ្នាំ២០១២ ជាហត្ថលេខីក្នុងការអនុវត្តទសវត្សរ៍ជនពិការប្រចាំតំបន់អាស៊ីនិងប៉ាស៊ីហ្វិក យុទ្ធសាស្ត្រអ៊ីឈាន់ ធ្វើឲ្យសិទ្ធិក្លាយជាការពិត ឆ្នាំ២០១៣-២០២២ បានចូលរួមយ៉ាងសកម្មជាមួយប្រទេសក្នុង សហគមន៍ក្នុងតំបន់ និងអន្តរជាតិ ដើម្បីលើកកម្ពស់សិទ្ធិជនមានពិការភាព។

លោក វង សូត បានបន្ថែមទៀតថា ការត្រៀមរៀបចំសន្និសីទលើកទី៥ ប្រចាំតំបន់អាស៊ីនិងប៉ាស៊ីហ្វិកស្តីពីការធ្វើបរិយាបន្នពិការភាពក្នុងការអភិវឌ្ឍន៍សហគមន៍ប្រកបដោយនិរន្តរភាពខាងមុខនេះ កម្ពុជានឹងបង្ហាញដល់គណៈប្រតិភូដែលមកពីបណ្តាប្រទេសនានាក្នុងតំបន់អាស៊ីនិងប៉ាស៊ីហ្វិកនូវសមិទ្ធិផលជាច្រើននៃវិស័យពិការភាពនៅកម្ពុជា ពិសេសនឹងរៀបចំដំណើរទស្សនកិច្ចជូនគណៈប្រតិភូដើម្បីទៅទស្សនាមជ្ឈមណ្ឌលជាតិជនពិការកម្ពុជាដែលកំពុងតែងសាងសង់ ហើយគ្រោងនឹងបញ្ចប់នៅមុនឆ្នាំ២០២៣។

លោករដ្ឋមន្ត្រី វង សូត ក៏ប្រកាសប្រគល់ភារកិច្ចជូន លោក ឯម ច័ន្ទមករា រដ្ឋលេខាធិការសង្គមកិច្ចនិងជាអគ្គលេខាធិការក្រុមប្រឹក្សាសកម្មភាពជនពិការ និងក្រុមការងារជាអ្នកត្រួតពិនិត្យគុណភាពសំណង់និងពន្លឿនការសាងសង់មជ្ឈមណ្ឌលជាតិជនពិការកម្ពុជាឱ្យទាន់ផែនការ ពោលគឺមុខព្រឹត្តិការណ៍សន្និសីទខាងលើនេះ។

គួរបញ្ជាក់ផងដែរថា សន្និសីទប្រចាំតំបន់អាស៊ីនិងប៉ាស៊ីហ្វិកស្តីពីការធ្វើបរិយាបន្នពិការភាពក្នុងការអភិវឌ្ឍន៍សហគមន៍ប្រកបដោយនិរន្តរភាព ធ្លាប់បានរៀបចំចំនួន ៤ដងរួចមកហើយ គឺ៖ លើកទី១ រៀបចំដោយរាជរដ្ឋាភិបាលថៃ ក្នុងឆ្នាំ២០០៩ មានអ្នកចូលរួម ៦៣០នាក់ មកពី៥៣ប្រទេស។ លើកទី២ រៀបចំដោយរដ្ឋាភិបាលភីលីពីនក្នុងឆ្នាំ២០១១ មានអ្នកចូលរួម៦២៨នាក់ មកពី៦៥ប្រទេស។ លើកទី៣ រៀបចំដោយរាជរដ្ឋាភិបាលជប៉ុន ក្នុងឆ្នាំ២០១៥ មានអ្នកចូលរួម៥៥០នាក់ មកពី៤៥ប្រទេស។ លើកទី៤ រៀបចំដោយរដ្ឋាភិបាល ប្រទេសម៉ុងហ្គោលី ក្នុងឆ្នាំ២០១៩ មានអ្នកចូលរួម៦៤៣នាក់ មកពី៤៣ប្រទេស និង លើកទី៥ នឹងធ្វើនៅខែមីនា ឆ្នាំ២០២៣ រៀបចំដោយរាជរដ្ឋាភិបាលកម្ពុជា៕

^{PHOTO: EAC NEW}